ek ek lamha guzara ja raha hai hosh mein
ai zahe-qismat jo hain tufan ki aaghosh mein

ab ye aalam hai hamara bandagi ke josh mein
ek sajda be-khudi mein ek sajda hosh mein [...]

kar gai diwangi hum ko bari har jurm se
chaak-damani se apni pak-damani hui

ain danai hai 'nasikh' ishq mein diwangi
aap saudai hain jo kahte hain saudai mujhe

kabhi khirad kabhi diwangi ne lut liya
tarah tarah se hamein zindagi ne lut liya

ye kahan se mauj-e-tarab uthi ki malal dil se nikal gae
wahi subh-o-sham jo the garan nafas-e-bahaar mein dhal gae

ye dayar-e-shauq hai ham-nashin yahan laghzishon mein bhi husn hai
jo mite wo aur ubhar gae jo gire wo aur sambhal gae [...]

khuli na mujh pe bhi diwangi meri barson
mere junun ki shohrat tere bayan se hui