ai zulm ke mato lab kholo chup rahne walo chup kab tak
kuchh hashr to un se utthega kuchh dur to nale jaenge

zulm par zulm aa gae ghaalib
aable aablon ko chhod gae

jine ka haq samraj ne chhin liya
uttho marne ka haq istimal karo

zillat ke jine se marna behtar hai
mit jao ya qasr-e-sitam pamal karo [...]

zindagi nach ki har lamha hai jannat-ba-kanar
dekh ye lab hain ye aankhen ye gulabi rukhsar

phir na aaegi palat kar teri duniya mein bahaar
aaj ki raat ghanimat hai charaghan kar len [...]

jaane kya kya zulm parinde dekh ke aate hain
sham dhale pedon par marsiya-khwani hoti hai

dabegi kab talak aawaz-e-adam hum bhi dekhenge
rukenge kab talak jazbaat-e-barham hum bhi dekhenge
chalo yunhi sahi ye jaur-e-paiham hum bhi dekhenge
dar-e-zindan se dekhen ya uruj-e-dar se dekhen
tumhein ruswa sar-e-bazar-e-alam hum bhi dekhenge
zara dam lo maal-e-shaukat-e-jam hum bhi dekhenge
ye zoam-e-quwwat-e-faulad-o-ahan dekh lo tum bhi
ba-faiz-e-jazba-e-iman-e-mohkam hum bhi dekhenge
jabin-e-kaj-kulahi khak par kham hum bhi dekhenge
mukafat-e-amal tarikh-e-insan ki riwayat hai
karoge kab talak nawak faraham hum bhi dekhenge
kahan tak hai tumhaare zulm mein dam hum bhi dekhenge
ye hangam-e-wida-e-shab hai ai zulmat ke farzando
sahar ke dosh par gulnar parcham hum bhi dekhenge
tumhein bhi dekhna hoga ye aalam hum bhi dekhenge