ye may ki pahli, din hai banda-e-mazdur ka
muddaton ke baad dekha is ne jalwa hur ka

ye jo rishta-dar tha hum sab ka lekin dur ka
mill ke malik ne ise rutba diya mansur ka [...]

aaj may ka pahla din hai aaj ka din mazdur ka din hai
zulm-o-sitam ke madd-e-muqabil hausla-e-jamhur ka din hai

aaj ka din ye ilm-o-hunar ka fikr-o-amal ki fath-o-zafar ka
aaj shikast-e-zulmat-e-shab hai aaj farogh-e-nur ka din hai [...]

dopahar ka waqt garma ki hawaen tez-tar
mehr ki tabish se pighle ja rahe hain dasht-o-dar

garm hai nahron ka pani sard hai nabz-e-bahaar
khushk patte jeb-o-daman kar rahe hain tartar [...]

waqt ka mara hua insan raunat ka shikar
jis ki mehnat ka natija azmat-e-sarmaya-dar

asl mein hindostan ka baadshah lekin ghulam
zindagi ki dusri manzil mein hai garm-e-khiram [...]

saron pe odh ke mazdur dhup ki chadar
khud apne sar pe use saeban samajhne lage

ped ke niche zara si chhanw jo us ko mili
so gaya mazdur tan par boriya odhe hue