main ne dekha hai bahaaron mein chaman ko jalte
hai koi khwab ki tabir batane wala

hasin naghma-sarao! bahaar ke din hain
labon ki jot jalao! bahaar ke din hain

takallufat ka mausam guzar gaya sahab!
naqab rukh se uthao bahaar ke din hain [...]

aaj hai roz-e-wasant ai dostan
sarw-qad hai bostan ke darmiyan
bagh mein hai aish-o-ishrat raat din
gul-rukhan bin nain guzarti ek din
sab ke tan mein hai libas-e-kesri
karte hain sad-barg sun lab ham-sari
khub-ru sab ban rahe hain lal zard
bagh ka bazar hai is waqt sard
chand jaisa hai shafaq bhitar ayan
chehra sab ka az-gulal aatish-fishan
har chhabeli az-libas-e-kesari
taza karti hai bahaare-e-jafri
nachti ga ga ke holi dam-ba-dam
jyun sabha indar ki dar bagh-e-iram
az kabir-o-rang-e-kesar aur gulal
abr chhaya hai safed-o-zard-o-lal
jiyun jhadi har su hai pichkari ki dhaar
daudti hain nariyan bijli ke sar
josh-e-ishrat ghar-ba-ghar hai har taraf
nachti hain sab takalluf-bar-taraf

patangen lutne walon ko kya malum kis ke hath ka manjha khara tha aur kis ki
dor halki thi
unhen is se gharaz kya pench padte waqt kin hathon mein larza aa gaya tha
aur kis ki khench achchhi thi?
hawa kis ki taraf thi, kaun si pali ki bairi thi?
patangen lutne walon ko kya malum?
unhen to bas basant aate hi apni apni dangen le ke maidanon mein aana hai
gali-kuchon mein kanti marna hai patangen lutna hai lut ke jauhar dikhana hai
patangen lutne walon ko kya malum kis ke hath ka manjha khara tha
aur kis ki dor halki thi?

lo phir basant aai
phulon pe rang lai
chalo be-darang
lab-e-ab-e-gang
baje jal-tarang
man par umang chhai
phulon pe rang lai
lo phir basant aai
aafat gai khizan ki
qismat phiri jahan ki
chale mai-gusar
su-e-lala-zar
ma-e-parda-dar
shishe ke dar se jhanki
qismat phiri jahan ki
aafat gai khizan ki
kheton ka har charinda
baghon ka har parinda
koi garm-khez
koi naghma-rez
subuk aur tez
phir ho gaya hai zinda
baghon ka har parinda
kheton ka har charinda
dharti ke bel-bute
andaz-e-nau se phute
hua bakht sabz
mila rakht sabz
hain darakht sabz
ban ban ke sabz nikle
andaz-e-nau se phute
dharti ke bel-bute
phuli hui hai sarson
bhuli hui hai sarson
nahin kuchh bhi yaad
yunhi ba-murad
yunhi shad shad
goya rahegi barson
bhuli hui hai sarson
phuli hui hai sarson
ladkon ki jang dekho
dor aur patang dekho
koi mar khae
koi khilkhilae
koi munh chidhae
tifli ke rang dekho
dor aur patang dekho
ladkon ki jang dekho
hai ishq bhi junun bhi
masti bhi josh-e-khun bhi
kahin dil mein dard
kahin aah-e-sard
kahin rang-e-zard
hai yun bhi aur yun bhi
masti bhi josh-e-khun bhi
hai ishq bhi junun bhi
ek naznin ne pahne
phulon ke zard gahne
hai magar udas
nahin pi ke pas
gham-o-ranj-o-yas
dil ko pade hain sahne
ek naznin ne pahne
phulon ke zard gahne

saqi kuchh aaj tujh ko khabar hai basant ki
har su bahaar pesh-e-nazar hai basant ki
sarson jo phul utthi hai chashm-e-qayas mein
phule-phale shamil hain basanti libas mein
patte jo zard zard hain sone ke pat hain
sadbarg se talai kiran phul mat hain
hain chudiyon ki jod basanti kalai mein
ban ke bahaar aai hai dast-e-hinai mein
masti bhare dilon ki umangen na puchhiye
kya mantiqen hain kya hain tarangen na puchhiye
mathe pe husn-khez hai jalwa gulal ka
bindi se auj par hai sitara jamal ka
gendon se mail-e-gul-e-bazi hasin hain
sar ke ubhaar par se dupatte mahin hain
aks-e-naqab zinat-e-rukhsar ho gaya
zewar jo sim ka tha tala-kar ho gaya
sarson ke lahlahate hain khet is bahaar mein
nargis ke phul phul uthe lala-zar mein
aawaz hai papihon ki masti bhari hui
tuti ke bol sun ke tabiat hari hui
koyal ke jode karte hain chuhlen surur se
aate hain tan udate hue dur dur se
baur aam ke hain yun chaman-e-kaenat mein
moti ke jaise guchchhe hon zar-kar pat mein
bheron ki gunj mast hai har kisht-zar mein
bansi bajate kishn hai goya bahaar mein
kesar kusum ki khub dil-afza bahaar hai
gendon ki har chaman mein do-ruya qatar hai
ek aag si lagai hai tesu ne phul ke
kya zard zard phul khile hain babul ke
hai ist dewtao ke mandir saje hue
hain zard zard phulon se kul dar saje hue
bas dew-ji ke lal ki jhanki ajib hai
aanand be-hisab dilon ko nasib hai
bansi jadaw sone ki lab se mili hui
dil ki kali kali hai nazar mein khili hui
pitambar nafis kamar mein kasa hua
khushbu se haar phul ki mandir basa hua
shanon pe bal pade hue zulf-e-siyah ke
radha se bar bar ishaare nigah ke
banki adaen dekh ke dil lot-pot hai
rutkaam istiri ke kaleje pe chot hai
kanon mein kunlon ki chamak hai jadaw se
radha lajai jati hai chanchal subhaw se
pyari ka hath apni baghal mein liye hue
aankhen sharab-e-husn-e-jawani piye hue
dil radhika ka baada-e-ulfat se chur hai
kuhni se thelne ki ada ka zuhur hai
chupki khadi hai kishn ke rukh par nigah hai
hai pahlu-e-jigar mein jagah dil mein rah hai
ulfat bhari jo bansi ki jaanib nazar gai
goya basant ki rag ki dhun mast kar gai
is chhab pe is singar pe dil se nisar 'ufuq'
qurban ek bar nahin lakh bar 'ufuq'
ai kishn nazirin ko mubarak basant ho
khela jo apne wo abad tak basant ho