teri yaadon ko pyar karti hun
sau janm bhi nisar karti hun
tujh ko fursat mile to aa jaana
main tera intizar karti hun

so gae anjum-e-shab yaad na aa
ai meri jaan-e-tarab yaad na aa
meri pathrai hui aankhon mein
koi aansu nahin ab yaad na aa

shikan na dal jabin par sharab dete hue
ye muskuraati hui chiz muskura ke pila
surur chiz ki miqdar par nahin mauquf
sharab kam hai to saqi nazar mila ke pila

chalte chalte tamam raston se
mast o masrur aa gae hain hum
ab jabin se naqab ulat dije
shahr se dur aa gae hain hum

aaj jaane ki zid na karo
yun hi pahlu mein baithe raho
aaj jaane ki zid na karo
hae mar jaenge, hum to lut jaenge
aisi baaten kiya na karo
aaj jaane ki zid na karo
tum hi socho zara kyun na roken tumhein
jaan jati hai jab uth ke jate ho tum
tum ko apni qasam jaan-e-jaan
baat itni meri man lo
aaj jaane ki zid na karo
yun hi pahlu mein baithe raho
aaj jaane ki zid na karo
waqt ki qaid mein zindagi hai magar
chand ghadiyan yahi hain jo aazad hain
in ko kho kar meri jaan-e-jaan
umr-bhar na taraste raho
aaj jaane ki zid na karo
kitna masum rangin hai ye saman
husn aur ishq ki aaj mearaj hai
kal ki kis ko khabar jaan-e-jaan
rok lo aaj ki raat ko
aaj jaane ki zid na karo
yunhi pahlu mein baithe raho
aaj jaane ki zid na karo

main shayad tum ko yaksar bhulne wala hun
shayad jaan-e-jaan shayad
ki ab tum mujh ko pahle se ziyaada yaad aati ho
hai dil ghamgin bahut ghamgin
ki ab tum yaad dildarana aati ho
shamim-e-dur-manda ho
bahut ranjida ho mujh se
magar phir bhi
masham-e-jaan mein mere aashti-mandana aati ho
judai mein bala ka iltifat-e-mehramana hai
qayamat ki khabar-giri hai
behad naz-bardari ka aalam hai
tumhaare rang mujh mein aur gahre hote jate hain
main darta hun
mere ehsas ke is khwab ka anjam kya hoga
ye mere andarun-e-zat ke taraj-gar
jazbon ke bairi waqt ki sazish na ho koi
tumhaare is tarah har lamha yaad aane se
dil sahma hua sa hai
to phir tum kam hi yaad aao
mata-e-dil mata-e-jaan to phir tum kam hi yaad aao
bahut kuchh bah gaya hai sail-e-mah-o-sal mein ab tak
sabhi kuchh to na bah jae
ki mere pas rah bhi kya gaya hai
kuchh to rah jae