abhi jawani hai mai-kade par abhi to baadal bhi hai ghanera

By

abhi jawani hai mai-kade par abhi to baadal bhi hai ghanera
abhi to zinda hai husn saqi abhi salamat hai ishq mera
wo shab ki sansen ukhad rahi hain wo ladkhadane laga andhera
utho musibat-kasho utho bhi utho ki hone ko hai sawera
mujhe na mahbus kar sakegi kisi bhi pazeb ki chhana-chhan
giraft ki manzilon se aage guzar chuka hai shuur mera
wo sarmadi sa hasin tarannum latif honton ka ek tabassum
mujhe ye ehsas kyon hai paiham ki jaise kuchh kho gaya hai mera
nazar uthana idhar na 'afsar' bura hai ye dollaron ka chakkar
udhar udhar ho gai safai jidhar jidhar us ne hath phera

aaghaz-e-mohabbat ka to anjam nahin hai

By

aaghaz-e-mohabbat ka to anjam nahin hai
ye subh wo hai jis ki kabhi sham nahin hai
kya dekhta hai apne siwa dekhne wale
aaina-e-dil jalwa-gah-e-am nahin hai
allah ri taqdir ki nakaami-e-paiham
yun baitha hun ab jaise koi kaam nahin hai
be-wajh kiya qaid asiron ko qafas mein
sayyaad ke sar phir bhi to ilzam nahin hai
marne nahin deti hai rihai ki tamanna
duniya mein mujhe warna koi kaam nahin hai
ab khak ho aiman ke bayaban mein tajalli
'afqar' koi be-parda sar-e-baam nahin hai

bhul baiThe sari duniya aashiqi ki KHatir

bhul baithe sari duniya aashiqi ki khatir
aashiqi bhi chhod di phir naukri ki khatir
mar dala har khushi ko khamushi ki khatir
kya nahin us ne kiya meri hansi ki khatir
muflisi aisi adu ko bhi na bakhsh maula
bechna ho jo charaghan raushni ki khatir
jaane kitne log guzre mujh se ho kar bhai
muntazir main rah gaya ek aadmi ki khatir
zindagi ko zindagi samjha nahin jaane kyun
zindagi bhi ja rahi thi zindagi ki khatir
qaid karna chahte the log suraj ghar mein
main lada kyun raushni se tirgi ki khatir
zist ko bhi ek tamasha hi bana kar rakkha
ai 'shafaq' kya tum ne chhoda shairi ki khatir

aadhon ki taraf se kabhi paunon ki taraf se

By

aadhon ki taraf se kabhi paunon ki taraf se
aawaze kase jate hain baunon ki taraf se
hairat se sabhi khak-zada dekh rahe hain
har roz zamin ghatti hai konon ki taraf se
aankhon mein liye phirte hain is dar-badari mein
kuchh tute hue khwab khilaunon ki taraf se
phir koi asa de ki wo phunkarte nikle
phir azhdahe firaun ke tonon ki taraf se
tu wahm-o-guman se bhi pare deta hai sab ko
ho jata hai pal bhar mein na honon ki taraf se
baaton ka koi silsila jari ho kisi taur
khamoshi hi khamoshi hai donon ki taraf se
phir baad mein darwaza dikha dete hain 'adil'
pahle wo uthate hain bichhaunon ki taraf se

dipawali

By

jab se aai hai dipawali
har taraf chhai hai raushni
har jagah chahaton ke diye
sham hote hi jalne lage
phul-jhadiyon ka bazar hai
ye patakhon ka tehwar hai
dipon ka hai suhana saman
jin se dharti bani kahkashan
jitne rocket patakhe chale
aasman par lage hain bhale
ho gain dur tarikiyan
ab hain raushan zamin aasman
jab se aai hain dipawali
har taraf chhai hai raushni
ek mauqa hai pahchan ka
dil milati hai insan ka
chahaton ki ye taswir hai
ek nae yug ki tabir hai