aa hi jata wo rah par 'ghaalib'
koi din aur bhi jiye hote

aadatan tum ne kar diye wade
aadatan hum ne e'tibar kiya

aabaad agar na dil ho to barbaad kijiye
gulshan na ban sake to bayaban banaiye

aadam se bagh-e-khuld chhuta hum se ku-e-yar
wo ibtida-e-ranj hai ye intiha-e-ranj

aadamiyyat aur shai hai ilm hai kuchh aur shai
kitna tote ko padhaya par wo haiwan hi raha

aa gai yaad sham dhalte hi
bujh gaya dil charagh jalte hi

aadhi raat aae tere pas ye kis ka hai jigar
chaunk mat itna ki ai hosh-ruba hum hi hain

aadmi se aadmi ki jab na hajat ho rawa
kyun khuda hi ki kare itni na phir yaad aadmi

aaba to 'zafar' nahin the aise
phir sher shiar kyun hua hai

aae to yun ki jaise hamesha the mehrban
bhule to yun ki jaise kabhi aashna na the

aabaadiyon mein kaise darinde ghus aae hain
maqtal gali gali hai har ek ghar lahu lahu

aadab-e-ashiqi se to hum be-khabar na the
diwane the zarur magar is qadar na the

aa umr-e-rafta hashr ke dam-kham bhi dekh len
tufan-e-zindagi ki wo halchal utha to la

aa ki tujh bin is tarah ai dost ghabraata hun main
jaise har shai mein kisi shai ki kami pata hun main

aadat hi bana li hai tum ne to 'munir' apni
jis shahr mein bhi rahna uktae hue rahna

aae mutthi band liye chal diye hath pasar
wo kya tha jo lut gaya dekho soch-bichaar

aa ai 'asar' mulazim-e-sarkar-e-girya ho
yan juz guhar khazane mein tankhwah hi nahin

aa gaya dil jo kahin aur hi surat hogi
log dekhenge tamasha jo mohabbat hogi

aa gaya tha ek din lab par jafaon ka gila
aaj tak jab un se milte hain to sharmate hain hum

aa gaya dhyan mein mazmun teri yaktai ka
aaj matla hua misra meri tanhai ka

aa ke salasil ai junun kyun na qadam le baad-e-qais
us ka bhi hum ne silsila az-sar-e-nau bapa kiya

aa rahi hai ye sada kan mein viranon se
kal ki hai baat ki aabaad the diwanon se

aae bhi wo chale bhi gae yan kise khabar
hairan hun main khayal hai ye ya ki khwab hai

aae thahre aur rawana ho gae
zindagi kya hai, safar ki baat hai

aadam-e-khaki se aalam ko jila hai warna
aaina tha to magar qabil-e-didar na tha