aae to yun ki jaise hamesha the mehrban
bhule to yun ki jaise kabhi aashna na the

aadamiyyat aur shai hai ilm hai kuchh aur shai
kitna tote ko padhaya par wo haiwan hi raha

aabaad mujh mein tere siwa aur kaun hai?
tujh se bichhad raha hun tujhe kho nahin raha

aa gaya tha ek din lab par jafaon ka gila
aaj tak jab un se milte hain to sharmate hain hum

aa gaya 'jauhar' ajab ulta zamana kya kahen
dost wo karte hain baaten jo adu karte nahin

aa gaya dil jo kahin aur hi surat hogi
log dekhenge tamasha jo mohabbat hogi

aadmi kya wo na samjhe jo sukhan ki qadr ko
nutq ne haiwan se musht-e-khak ko insan kiya

aa gaya yaad unhen apne kisi gham ka hisab
hansne walon ne mere ashk jo gin ke dekhe

aabru shart hai insan ke liye duniya mein
na rahi aab jo baqi to hai gauhar patthar

aa kar teri gali mein qadam-bosi ke liye
phir aasman ki bhul gaya rah aaftab

aae bhi wo chale bhi gae yan kise khabar
hairan hun main khayal hai ye ya ki khwab hai

aa jae na dil aap ka bhi aur kisi par
dekho meri jaan aankh ladana nahin achchha

aadatan tum ne kar diye wade
aadatan hum ne e'tibar kiya

aa ai 'asar' mulazim-e-sarkar-e-girya ho
yan juz guhar khazane mein tankhwah hi nahin

aade aaya na koi mushkil mein
mashware de ke hat gae ahbab

aa ke ab jangal mein ye uqda khula
bhediye padhte nahin hain falsafa

aadmi ke pas sab kuchh hai magar
ek tanha aadamiyyat hi nahin

aabaad agar na dil ho to barbaad kijiye
gulshan na ban sake to bayaban banaiye

aae kuchh abr kuchh sharab aae
is ke baad aae jo azab aae

aa ki main dekh lun khoya hua chehra apna
mujh se chhup kar meri taswir banane wale

aa umr-e-rafta hashr ke dam-kham bhi dekh len
tufan-e-zindagi ki wo halchal utha to la

aabaad gar wo chahe dil ko to kar sake hai
manzur hai par is ko mera kharab rakhna

aae jo chand tinke qafas mein saba ke sath
main ne unhin ko apna nasheman samajh liya

aa rahi hai ye sada kan mein viranon se
kal ki hai baat ki aabaad the diwanon se

aadam ka jism jab ki anasir se mil bana
kuchh aag bach rahi thi so aashiq ka dil bana