aalam ka Dar hai jinhen aalam se pahle

aalam ka dar hai jinhen aalam se pahle
kar dete hain raushan wo diya sham se pahle
jo tut gaya rishta-e-ulfat hi to kyon log
lete hain tera nam mere nam se pahle


madhosh jo ho jaun to hairat mein na padna
aankhon se pila dete hain wo jam se pahle
hai kohkan-o-'qais' ki rudad mujhe yaad
anjam se waqif hun main anjam se pahle


sayyaad se hushiyar rahen tair-e-nau-khez
dana bhi bichha dete hain ye dam se pahle
main kucha-e-jaanan mein qadam rakhta hun jab bhi
leta hun ijazat dil-e-nakaam se pahle


achchhon se pata chalta hai insan ko buron ka
rawan ka pata chal na saka ram se pahle
'rizwan' na tha ehsas musawat-e-bashar ka
insan ko paighambar-e-islam se pahle