بے گناہی کی سزا دیں گے ترے شہر کے لوگ

بے گناہی کی سزا دیں گے ترے شہر کے لوگ
مجھ کو دیوانہ بنا دیں گے ترے شہر کے لوگ
شاہراہوں پہ ہمیشہ نہ ملا کر مجھ سے
تجھ پہ الزام لگا دیں گے ترے شہر کے لوگ


تو مرا ذکر نہ کر میرا کہیں نام نہ لے
آگ پانی میں لگا دیں گے ترے شہر کے لوگ
شام ہوتے ہی دماغوں پہ جنوں چھائے گا
کوئی افواہ اڑا دیں گے ترے شہر کے لوگ


میری آنکھوں میں ٹٹولیں گے سب اپنے چہرے
آئنہ مجھ کو بنا دیں گے ترے شہر کے لوگ
آ کے بیٹھوں گا کسی دن جو گھڑی بھر کے لئے
تیرے آنگن سے اٹھا دیں گے ترے شہر کے لوگ


حادثہ رات کا ہوں میں مری وقعت کیا ہے
صبح ہوتے ہی بھلا دیں گے ترے شہر کے لوگ
جانتا ہوں مجھے پیاسا تو نہ رہنے دیں گے
کم سے کم زہر پلا دیں گے ترے شہر کے لوگ


اپنے کاندھوں پہ اٹھائے ہوئے جاتے ہیں عزیزؔ
مجھ کو مٹی میں ملا دیں گے ترے شہر کے لوگ