dauran-e-jang himmat-e-mardana chahiye

dauran-e-jang himmat-e-mardana chahiye
himmat agar nahin hai to mar jaana chahiye
ye kya ki buz-dilon ki tarah guftugu karen
pesh-e-harif shan-e-harifana chahiye


tera har e'tiraaz sar aankhon pe hai magar
andaz-e-e'tiraaz sharifana chahiye
zor-e-bayan nahin na sahi waqt-e-guftugu
tarz-e-sukhan ba-rang-e-kalimana chahiye


pani mein rahna hai to na rakkhen magar se bair
az-rah-e-maslahat sahi yarana chahiye
bujhte hue dilon ko jo tahrik de sake
kirdar aisa hausla-mandana chahiye


'rahbar' kisi ki ham-safari ho jahan se bar
tum ko usi maqam se laut aana chahiye