dhup mein jaise kuhasa ek tasawwur aap ka

dhup mein jaise kuhasa ek tasawwur aap ka
hai hasin jhonka hawa ka ek tasawwur aap ka
zehn mein aa kar kahin se gudgudane lag gaya
dekh kar mujh ko ruwansa ek tasawwur aap ka


sidhiyan kitni bhi chadh lun bhul jaane ki bhale
sanp hai ninanwe ka ek tasawwur aap ka
ye nahin ho to khalish hai aur ho to bhi khalish
dard hai lekin dawa sa ek tasawwur aap ka


raat-din pichhe lag rahta hai saya sa mere
be-tahasha bad-hawasa ek tasawwur aap ka
go haqiqat khwahishon par munh chidati hai magar
hai haqiqat par tamacha ek tasawwur aap ka