dil na raushan hua daulat ke parastaron ka
nur badhta hi raha shahr ke minaron ka

zakhm riste hue ban jata hai aksar nasur
kaam marham ne kiya ho jahan angaron ka

rail ki patri pe rakkhi hai wo gathri dekho
jurm poshida raha jis mein siyah-karon ka

mahw-e-hairat hun wahan izzat-e-fankar gai
chal gaya sikka jahan hashiya-bardaron ka

zindagi ashk-e-nadamat liye phirti hai 'rais'
roz uthta hai janaza yahan fankaron ka