fikr mujhe gulzaron ki hai maula KHair

By shamim-farhatFebruary 5, 2022
fikr mujhe gulzaron ki hai maula khair
barish to angaron ki hai maula khair
dushman to dukh dene mein nakaam hue
bari ab gham-khwaron ki hai maula khair


ulajh rahe hain sare masiha aapas mein
fikr kise bimaron ki hai maula khair
diwana gul-daste le kar phirta hai
mashq jahan talwaron ki hai maula khair


logon ke kandhon par sar kyon qaem hain
fikr yahi salaron ki hai maula khair
tel se 'farhat' aag bujhane nikle hain
aql ajab salaron ki hai maula khair


79565 viewsghazalEnglish