hadis-e-zindagi sunte rahe hain

hadis-e-zindagi sunte rahe hain
badi muddat se sar dhunte rahe hain
hue hain pash ek zarb-e-fana se
jo sapne umr bhar bunte rahe hain


bhara phulon se tha gulshan ka daman
magar hum khar hi chunte rahe hain
rubab-e-waqt ne chheda tarana
jise hum dub kar sunte rahe hain


sar-e-rah har qadam bikhre the kante
jinhen palkon se hum chunte rahe hain
urus-e-shaeri tere liye hum
sukhan ke phul hi chunte rahe hain


suna 'faiz'-e-hazin tera fasana
jo ahl-e-dil the sar dhunte rahe hain