hamare dil mein kisi gul-badan ke pyar ke phul
ki dastaras mein nahin hain ye dewdar ke phul

taras rahe hain kisi lams-e-mo'tabar ke liye
mere khayal ki shakhon pe intizar ke phul

kisi se koi tawaqqo' ka silsila hi nahin
bade kamal ke hote hain khar-zar ke phul

koi bhi tujh pe meri jaan yaqin kyon na kare
tere kalam se jhadte hain eatibar ke phul

unhen bahaar ke aane ka intizar kahan
pighalti barf mein khilte hain kohsar ke phul

unhen qubul nahin aaftab ki dawat
jalega dip to phulenge har-singar ke phul