hamare gham ka charcha ho raha hai

By rehman-musawwirOctober 13, 2020
hamare gham ka charcha ho raha hai
ajab jashn-e-tamanna ho raha hai
main bahar se uchak kar dekhta hun
mere andar tamasha ho raha hai


nae ki fikr mein hum ghul rahe hain
naya har pal purana ho raha hai
badan mein chubh rahi hai tez barish
nadi ka zakhm gahra ho raha hai


tumhaari yaad dhundli pad rahi hai
to kya qismat ka likkha ho raha hai
khudai chal rahi hai dil-zamin par
purana shahr zinda ho raha hai


67561 viewsghazalEnglish