har ghadi ek yahi ehsas-e-ziyan rahta hai
aag raushan thi jahan sirf dhuan rahta hai

khatm hota hi nahin dasht ka ab sannata
koi mausam ho yahan ek saman rahta hai

aa gai ras mere dil ki udasi shayad
itni muddat bhi kahin daur-e-khizan rahta hai

phul khilte hain to murjhae hue lagte hain
ek ajab khauf sar-e-shakh-e-guman rahta hai

saz ke tar hain tute hue mutrib chup hain
ab fazaon mein faqat shor-e-sagan rahta hai

rasta chalte hue log thithak jate hain
har-qadam jaise tah-e-sang-e-garan rahta hai

main bhi ruk jaun magar ruk nahin pata 'alam'
ek dariya sa sada mujh mein rawan rahta hai