hawa jab kisi ki kahani kahe hai
nae mausamon ki zabani kahe hai

fasana hai jismon ka be-shak zamini
magar ruh to aasmani kahe hai

tujhe chal zara sa main mitha bana dun
samundar se dariya ka pani kahe hai

dasa rat-jagon ne hai khwabon ko phir se
sulagti hui raat-rani kahe hai

laten chand chandi ki bakhshin tujhe ja
widaa leti mujh se jawani kahe hai

hai chadhne lagi phir se dhalti hui umr
teri shirt ye zafrani kahe hai

nai baat ho ab nae git chhedo
guzarti ghadi har purani kahe hai