hum jurm-e-mohabbat ki saza pae hue hain

hum jurm-e-mohabbat ki saza pae hue hain
be-wajh nahin hai ki jo sharmae hue hain
thi jin ki tab o tab se is bazm ki raunaq
dipak wo sar-e-sham hi kajlae hue hain


har samt siyahi hai ghata-top andhera
kya zulf-e-dota aaj wo bikhrae hue hain
hum khugar-e-taslim-o-raza aaj hain warna
mazi mein bahut thokaren bhi khae hue hain


hai barbat-e-dil sakhti-e-mizrab se larzan
talkhi-e-mohabbat ka maza pae hue hain
ai dost sukun hum ko mayassar nahin hota
aashuftagi-e-dahr se ghabrae hue hain