isi se ujDa hua lala-zar hai shayad

isi se ujda hua lala-zar hai shayad
chaman se dur abhi tak bahaar hai shayad
azal se gosh-bar-awaz hai jahan sara
teri sada ka use intizar hai shayad


usi se talib-e-jalwa pe bijliyan na girin
abhi hijab hi mein wo nigar hai shayad
pukarta hai zamana magar nahin sunta
koi samand hawa par sawar hai shayad


dua ko hath uthae hue hai ek bekas
karam ka aap ke umid-war hai shayad
pahunch gaya hai jo ud kar kisi ke daman tak
wo meri khak-e-lahad ka ghubar hai shayad


utha jo dar-e-fana se gaya wo su-e-adam
musafiron ki yahi rahguzar hai shayad
tere karam ne nawaza nahin jo ai saqi
udas isi se tera mai-gusar hai shayad


kalim-e-tur ne dekha tha ai 'tarab' jis ko
usi hasin ka zamana shikar hai shayad