jis jagah aagahi muqayyad hai

By ahmad-sajjad-babarOctober 23, 2020
jis jagah aagahi muqayyad hai
us jagah zindagi muqayyad hai
bujh rahe hain gulab se chehre
kya yahan tazgi muqayyad hai


chand jis ka tawaf karta tha
ab wahan khak si muqayyad hai
ek arzi liye main hazir hun
munsifa raushni muqayyad hai


khak-e-karbal mein aaj bhi logo
ek ajab tishnagi muqayyad hai
kachche ghar ke nasib mein 'babar'
ja-ba-ja khastagi muqayyad hai


17251 viewsghazalEnglish