koi harf-e-nafi na kaam aaya

koi harf-e-nafi na kaam aaya
kitni sachchi thi dosti apni
thokaren kha kar ke surakh-ru thahra
ek dua hai ye zindagi apni


ab kahan hai koi harif apna
khub darti hai be-kasi apni
kaise tarikh ko bhula dalun
khun mein dubi hai ye sadi apni


kuchh na khata hun kuchh na pita hun
bhuki soti hai muflisi apni
khali botal taka hi karti hai
kitni pyasi hai mai-kashi apni


shayad apna khuda tarash liya
ab kahan hai wo bandagi apni
shayad 'iqbaal' se dari hogi
pahle sarshaar thi khudi apni


sare alfaz sath chhod gae
sada kaghaz hai shairi apni
karwan chhod ke wo aaya hai
ek musafir hai rahbari apni