kuchh kar-e-anasir tah-e-dariya bhi ajab hai

kuchh kar-e-anasir tah-e-dariya bhi ajab hai
is khak mein pinhan koi shoala bhi ajab hai
duniya se kuchh aisa bhi nahin rabt hamara
sunte hain magar lazzat-e-duniya bhi ajab hai


hai dil hi kisi aarzu-e-wasl ka maskan
dil ka magar is rah pe aana bhi ajab hai
wo did hai ab aalam-e-maujud se aage
is saat-e-masud ka dhoka bhi ajab hai


tai hoti chali jati hai be-faiz masafat
is rah mein diwar ka aana bhi ajab hai
khilta nazar aata hi nahin hai gul-e-umid
jata hi nahin dil se ye dhadka bhi ajab hai


is zist pe sahra ka guman tak nahin hota
ai nakhl-e-mohabbat tera saya bhi ajab hai