kya kahun khamosh dariya se main pani ke liye
mauj hi raazi nahin koi rawani ke liye

lag gae rang-e-hunar sab ek hi taswir mein
phir koi surat na nikli naqsh-e-sani ke liye

sochta hun main bhi dekhun dil ke aaine mein ab
kitni gunjaish hai aks-e-kaamrani ke liye

koi gar puchhe to kya batlaiye jate hue
hum ne to kuchh bhi nahin chhoda nishani ke liye

samne us shoala-ru ke jal sake kis ka charagh
chand suraj bhi hain jis ki pasbani ke liye