lipTi hui phirti hai nasim unki qaba se

lipti hui phirti hai nasim un ki qaba se
gul khilte hain har gam pe daman ki hawa se
dil aisa diya kyun ki raha kushta-a-jaanan
tum se nahin ye shikwa bhi karna hai khuda se


mahram hain hamin garmi-e-guftar se un ki
jo hont jo aankhen hain giran-bar haya se
aahista karo chaak gulo apna gareban
gunje na chaman ghunchon ke hansne ki sada se


kholenge unhin hathon ke nakhun girah-e-dil
jo basta hain rangini-o-khushbu-e-hina se
tabir ke sahraon mein hain khwab-e-pareshan
dariya ko sarabon se sada dete hain pyase


lete ho agar nam-e-shahidan to hai ye shart
jaan jae rahe pa na haten rah-e-wafa se