meri fariyaad suno aao bacha lo mujhko

By mohsin-aftab-kelapuriNovember 7, 2020
meri fariyaad suno aao bacha lo mujh ko
apne andar hi phansa hun main nikalo mujh ko
haq-bayani hai agar jurm to phir ai logon
qatl kar do mera nezon pe uchhaalo mujh ko


de raha hun main ye taklif tumhein aakhiri bar
apne kandhon pe mere bachchon utha lo mujh ko
sab ko hasil nahin hota hun main aasani se
mujh se milne ki hai khwahish to khangalo mujh ko


meri tahzib ye kahti hai mujhe ro ro kar
main hun girti hui diwar sambhaalo mujh ko
59275 viewsghazalEnglish