qissa-e-naf-o-zarar yaad aaya
phir azizon ka hunar yaad aaya

pet par bandh liya hai patthar
jab kabhi luqma-e-tar yaad aaya

aaya piri mein ibaadat ka khayal
hae kab zad-e-safar yaad aaya

jab kabhi us ko bhulana chaha
wo ba-andaz-e-digar yaad aaya

dekh kar dast-e-hinai un ka
khun-e-dil khun-e-jigar yaad aaya

nahin aasan zamin-e-'ghaalib'
tha hamein zoam-e-hunar yaad aaya

koi milta tha gale hum se 'shakil'
dekh kar shane ko sar yaad aaya