rahi agarche nigaron ki mehrbani bhi
bahut kharab kati raat bhi jawani bhi

tujhe ganwa ke tere waston ka kya karte
isi liye to na rakkhi koi nishani bhi

dil-o-nigah ke raston mein kaun hail hai
ki hum pe band hue raushni bhi pani bhi

agar labon se na nikle agar dilon mein rahe
bahut nai hai abhi baat ek purani bhi

azab-e-sohbat-e-na-jins ke shikar hain hum
khuda zamin pe hamein de hamara sani bhi