shab-rang parinde rag-o-reshe mein utar jaen
kohsar agar meri jagah hon to bikhar jaen

har samt siyah gard ki chadar si tani hai
suraj ke musafir bhi idhar aaen to mar jaen

sab khel hawaon ke ishaaron pe hai warna
maujen kahan mukhtar ki ji chahe jidhar jaen

is dasht mein pani ke siwa dhundhna kya hai
aankhon mein meri ret ke sau zaiqe bhar jaen

sae ki tarah sath hi chalta hai siyah-bakht
ab hath ki bechaari lakiren bhi kidhar jaen