wo zindagi jo shab-e-intizar guzri thi

wo zindagi jo shab-e-intizar guzri thi
tere karam se bahut khush-gawar guzri thi
ghazab ki aaj wahi dil hai gham-kash-e-duniya
nigah-e-naz bhi kal jis pe bar guzri thi


sukun-nasib wahi ab hain jin ki umr kabhi
harif-e-gardish-e-lail-o-nahaar guzri thi
fareb-e-nur-e-sahar de gai nigahon ko
jo barq raat sar-e-shakh-sar guzri thi


zamana aaj qayamat samajh raha hai jise
wahi to sar se mere bar bar guzri thi
khabar hai kis ko nasheman ke chaar tinkon ki
ye jaanta hun saba be-qarar guzri thi


na jaane kyon hai mohabbat ko phir usi ki talash
wo barhami jo kabhi nagawar guzri thi
'nazir' lala-o-gul par nikhaar hai ab tak
hai kab ki baat chaman se bahaar guzri thi