aae the pardes mein do chaar barson ke liye

aae the pardes mein do chaar barson ke liye
ro rahe hain baith kar aainda naslon ke liye
ghair-mulki hain yahan par ham-watan main ajnabi
bech di pahchan apni hum ne paison ke liye


kar diya mazduriyon ne budha hum ko is tarah
bin paron ke jaise panchhi hon udanon ke liye
kuchh pe kachra ghar bane hain kuchh pe qabza ho gaya
chhod aae the zamin jo hum makanon ke liye


hum ghariban-e-watan ki qatl gahen ban gain
bastiyan mashhur thin jo khush-jamalon ke liye
karte hain hum zikr rab ka hont apne bhinch kar
kholte hain ab zaban dhimi azanon ke liye


ek purkhon ka 'zafar' hai dusra bachchon ka hai
des koi bhi nahin hai mere jaison ke liye