aakhiri zarb dil par lagate hue
kaun rukhsat hua muskuraate hue

un ki dahliz tak hum gae to magar
dastaken raston mein lutate hue

kah gai thi saba ye mere kan mein
phir idhar aaungi aate-jate hue

dil lagane ko sara jahan tha magar
sochta kaun hai dil lagate hue

zindagi ki tawalat ka 'uqda khula
ret par ek gharaunda banate hue

kuchh sitare the raushan jabin par meri
tum ne dekha nahin jhilmilate hue

kitne rishton ka main ne bharam rakh liya
ek ta'alluq se daman chhudate hue

kitne hi raaz sab par 'ayan ho gae
ek tera raaz-e-ulfat chhupate hue

yun guzarta raha karwan-e-hayat
khud se apna ta'aruf karaate hue