آلام روزگار سے مرعوب ہو گئے

آلام روزگار سے مرعوب ہو گئے
سارے اصول عشق کے معیوب ہو گئے
شاید میں اپنے آپ سے غافل نہ رہ سکا
کچھ لوگ میری ذات سے منسوب ہو گئے


پہلے پہل تو ہم پہ ترا کچھ اثر ہوا
پھر دیکھتے ہی دیکھتے مغلوب ہو گئے
پہنچا نہ کچھ ہمارا کہا ان کے ذوق تک
سمجھے تھے ہم کہ صاحب اسلوب ہو گئے


شہرت کی سادگی نے بھی کیا کیا نہ کچھ کیا
کتنے ہی بدترین تھے جو خوب ہو گئے
تیرا فراق باعث کیف و نشاط تھا
دنیا ترے وصال میں مجذوب ہو گئے


احمرؔ کا کیا بنا کوئی پوچھے تو یہ کہو
نذر ستم ظریفیٔ محبوب ہو گئے