aam sa ek shaKHs hai ye farhat-ehsas aap ka

'am sa ek shakhs hai ye 'farhat-ehsas' aap ka
'ishq ne is ko banaya hai magar khas aap ka
aap tanhai mein kab milte hain kuchh to boliye
khatm kab hota hai aaine mein ijlas aap ka


aur kitna pas aaun main ki pas aa jaen aap
kuchh to kahiye aur kitni dur hai pas aap ka
sahiba hum ko gale se bhi laga lije kabhi
kab talak qadmon mein hi baitha rahe das aap ka


gosht mere jism ka tarik ho jata hai kyon
sham aate hi damak uthta hai kyon mas aap ka
wo jo hain ek jauhari se ‘farhat-ullah-khan’ hain
ye lafanga jo hai ye hai ‘farhat-ehsas' aap ka