aankhon ko aansuon ki zarurat hai aaj bhi

aankhon ko aansuon ki zarurat hai aaj bhi
jitni bhi rah gai hai mohabbat hai aaj bhi
sazish ki ek sham bujhae gae the hum
lekin diyon ko taq se nisbat hai aaj bhi


kuchh bhi sanbhaal pae na hum tang-dast log
ye khak-dan-e-jism hi daulat hai aaj bhi
aise namaziyon ka wuzu bhi na kar qubul
ya-rab dilon mein kitni kudurat hai aaj bhi


lekin tumhaare husn ka ne'mul-badal kahan
dil mein to be-hisab mohabbat hai aaj bhi
ta'lim de raha hun mohabbat ki jism ko
mushkil ye hai ki ruh ki sohbat hai aaj bhi


insan ban ke baitha hai har aadmi-numa
duniya pe ek khayal ki dahshat hai aaj bhi