آپ ہمیں کیا بھول گئے ہیں

آپ ہمیں کیا بھول گئے ہیں
ہم تو جینا بھول گئے ہیں
کرتا ہے کمرے کی صدارت
وہ جو دوپٹہ بھول گئے ہیں


غم کا مستقبل روشن ہے
بچے ہنسنا بھول گئے ہیں
کل کی طرح پھر یاد دلاؤ
ہم کچھ کہنا بھول گئے ہیں


آج اسی کی سیر کریں گے
وہ جو دنیا بھول گئے ہیں
ان کو منزل ڈھونڈ ہی لے گی
گھر کا رستہ بھول گئے ہیں


ان سازوں کو توڑ ہی دیں گے
ہم جو بجانا بھول گئے ہیں
ان کو بھولنے کی کوشش میں
جانے کیا کیا بھول گئے ہیں


تم سے باتیں کرنے والے
باتیں کرنا بھول گئے ہیں