aas jis ki jawan hoti hai

aas jis ki jawan hoti hai
us ki unchi udan hoti hai
jo qalam aabid-e-adab thahra
us ki hi aan-ban hoti hai


tir lagta hai dil ke thik upar
jab nazar mein kaman hoti hai
rang taqdir ka badal jae
jab wafa mehrban hoti hai


yaad aati hai jis ghadi us ki
wo ghadi imtihan hoti hai
bin kahe bin sune ye dil samjhe
baat jo darmiyan hoti hai


bad-nasibi sukun se soe
jab sawere azan hoti hai
hai buland us ka parcham-e-qismat
jis pe tu mehrban hoti hai


wo hi chhute hain aasman 'panchhi'
jin paron mein bhi jaan hoti hai