aashiyan tha hum se hum the aashiyane ke liye
roiye kya ab qafas mein is zamane ke liye

kar-farma hain niyaz-e-ishq ki majburiyan
sajde le kar main chala tha aastane ke liye

kashmakash mein hai hayat-o-maut ki jaan-e-hazin
aap aa jaen zara qissa chukane ke liye

koi hota hai kharidar-e-mataa-e-ahl-e-dil
daulat-e-darain late hain lutane ke liye

ho qafas ki tiliyon par bhi nigah-e-lutf-e-barq
kya nasheman hi ke tinke the jalane ke liye