aatish-e-ishq mein kya kya nahin jalte dekha
dil to kya chiz hai lohe ko pighalte dekha

qadr-e-duniya-e-do-roza hai fana hone se
barg-rezi ko isi bagh mein phalte dekha

roz-e-mahshar ki daraazi ki qasam deta hun
kah to de koi ki din hijr ka dhalte dekha

ku-e-qatil mein ye pakwan hai ye khana hai
bhunte dekhe jigar hathon ko talte dekha

hijr-e-jaanan mein kahin jine se marna behtar
zindagani ke maze ko yahin khalte dekha

parwarish teri hai mahi-o-samundar se inan
koi pani mein koi aag mein palte dekha

chaukdi bhul gae mere hawas-e-khamsa
us ki bagghi ko sadak par jo nikalte dekha

misl-e-auraq-e-shajar ranj-e-khizan mein ai 'rashk'
jis ko dekha kaf-e-afsos hi malte dekha