aayat hijr ki bayan tafsir ki nahin
dil par guzarti jo bhi wo tahrir ki nahin

koi to bhed hoga khamoshi ke aas-pas
jalti hui nigah ne taqrir ki nahin

dastak tere jamal ne jab bhi zehn pe di
uth kar gale laga liya takhir ki nahin

tujh ko rakha sanbhaal ke putli ke darmiyan
ojhal kabhi nigah se taswir ki nahin

main to tumhaari qaid mein jita hun raat-din
dhili kabhi khayal ne zanjir ki nahin

dil mein rakha tujhe jo to puja hai apna aap
phir main ne apni zat ki tahqir ki nahin

teri jafa ki bakhshi nishani sanbhaal li
mitte hue wajud ki tamir ki nahin

dekha jo pura khwab adhura hi rah gaya
main ne bhi phir ayan kabhi tabir ki nahin

wahid wajud tere se raushan hai mera dil
tujh bin kisi ko chahun ye taqsir ki nahin