ab dil mein wo ranai-e-ehsas nahin hai

ab dil mein wo ra'nai-e-ehsas nahin hai
kis phul mein warna teri bu-bas nahin hai
barbaad-e-mohabbat ki ye aasuda-mizaji
ab gardish-e-dauran ka bhi ehsas nahin hai


kanton pe guzari hai sar-e-bazm-e-gulistan
ghunchon ko tabassum ki ada ras nahin hai
bakhshe hain teri chashm-e-'inayat ne wo nashtar
is dil ko tadapne ka bhi ehsas nahin hai


majburi-e-fitrat hai mere lab ka tabassum
mere dil-e-majruh ka akkas nahin hai
ghunchon mein kahan tere tabassum ki adaen
phulon mein teri nikhat-e-anfas nahin hai


duniya-e-khalish ne’mat-e-gham yas ka 'alam
hai kaunsi daulat jo mere pas nahin hai
aa jaiye ab aap meri khalwat-e-gham mein
is waqt mera dil bhi mere pas nahin hai


har 'aks mein aa jae nazar 'badr' wo lekin
raushan abhi aaina-e-ehsas nahin hai