ab KHwahish-e-talafi-e-mafat bhi gai

ab khwahish-e-talafi-e-mafat bhi gai
ji mein jo thi ek baat so wo baat bhi gai
afkar-e-nau-ba-nau ne kiya waqt raegan
kin uljhanon mein fursat-e-auqat bhi gai


radd-e-sawal se nahin be-khauf arz-e-shauq
phir baat kya karenge agar baat bhi gai
ahwal-e-haal hi ko muqaddar samajh liya
lo aaj fikr-e-gardish-e-haalat bhi gai


hain subh ke hisab mein akhtar shumariyan
chamka na aaftab to kya raat bhi gai
hai aaj aabgina-e-ehsas chur chur
jaane kahan rawani-e-jazbaat bhi gai


wo aaj kho gaya hai 'munawar' hujum mein
ummid-e-yar bahr-e-mulaqat bhi gai