ab naya ishq hai us ka meri tanhai se

ab naya 'ishq hai us ka meri tanhai se
ya'ni main haar gaya apni hi tanhai se
'ain usi lamhe mein dastak hui darwaze par
bandh gai thi zara ummid si tanhai se


kuchh nae phul hi bazar mein aae hote
main bhi guldan sajata nai tanhai se
main ne socha ki khuda kitna akela hoga
apni tanhai mitai badi tanhai se


gadhta rahta hun yunhi waqt-guzari ke liye
rang sannate se aur raushni tanhai se
aakhiri bar wo aaya tha 'ayaadat ko magar
khub jhagde kiye dam todti tanhai se