abhi talak kisi gumnam aasman mein hai

abhi talak kisi gumnam aasman mein hai
khuda ka shukr parinda mera udan mein hai
khamoshi jism mein paiwast ho gai hai magar
bas ek chikh hai baqi jo imtihan mein hai


'ajib ro'b ka 'alam hai khauf mein hai yazid
asar kuchh aisa hi bimar ke bayan mein hai
tumhaare hijr ka mara ye na-tawan kam-zarf
hamara dil bhi kisi wasl ke guman mein hai


jo meri pusht pe karta hai war chhup-chhup kar
wo ek shakhs mere apne khandan mein hai
wo ek shakhs jo ab mujh pe ho gaya hai haram
wo ek shakhs jo ab bhi mere guman mein hai


'alam lagaya hai ghazi ka tab se ghar mein 'wasim'
zamane-bhar ka ujala mere makan mein hai