adam se lai hai hasti mein justuju teri

'adam se lai hai hasti mein justuju teri
thaharne degi yahan bhi na aarzu teri
basar hui shab-e-gham kis tarah se puchh to le
mere tadapne ki shahid hai aarzu teri


hai ka'be mein na tasalli na but-kade mein sukun
mujhe kahin ka na rakkhegi aarzu teri
shab-e-firaq mein ab jaan le ke niklegi
ajal ke bhes mein aai hai aarzu teri


kalim de chuke ab mera imtihan le le
mujhe bhi tur pe lai hai aarzu teri
tasalliyan to shab-e-gham mein dil ko deti hai
kahunga tujh se to achchhi hai aarzu teri


buton ko marja’-e-hajat bana na ai 'rafat'
kahin bana na de kafir ye aarzu teri