agar kuchh fikr ke lamhe mayassar ho gae hote

agar kuchh fikr ke lamhe mayassar ho gae hote
charaghon ki tarah hum bhi munawwar ho gae hote
agar main zindagi kuchh din bhi tere sath rah leta
to duniya ke kai ehsan mujh par ho gae hote


tujhe pane ki khwahish mein ganwa di zindagi apni
tujhe socha agar hota sukhanwar ho gae hote
agar aasan hota zindagi ke dukh chhupa dena
to phir ab tak kai qatre samundar ho gae hote


kuchh aisa khauf dil par ajnabi chehron ka tha 'nadir'
sada deta nahin koi to patthar ho gae hote