agar safar mein mere sath mera yar chale

agar safar mein mere sath mera yar chale
tawaf karta hua mausam-e-bahaar chale
laga ke waqt ko thokar jo khaksar chale
yaqin ke qafile hamrah be-shumar chale


nawazna hai to phir is tarah nawaz mujhe
ki mere ba'd mera zikr bar bar chale
ye jism kya hai koi pairahan udhaar ka hai
yahin sanbhaal ke pahna yahin utar chale


ye jugnuon se bhara aasman jahan tak hai
wahan talak teri nazron ka iqtidar chale
yahi to ek tamanna hai is musafir ki
jo tum nahin to safar mein tumhaara pyar chale