عہد شباب موسم خنداں ہے اور ہم

عہد شباب موسم خنداں ہے اور ہم
ہر سو نگار جلوہ فروشاں ہے اور ہم
محفوظ دل میں شورش پیکاں ہے اور ہم
خلوت نواز خاطر مہماں ہے اور ہم


صبر آزما تصور جاناں ہے اور ہم
آنکھوں میں آج حشر کا ساماں ہے اور ہم
اک منظر گزارش پنہاں ہے اور ہم
ان کے حضور دیدۂ حیراں ہے اور ہم


دور شراب صحبت رنداں ہے اور ہم
ساغر بدست چشم حسیناں ہے اور ہم
احساس نے گناہ کی دنیا سمیٹ لی
اب رحمت تمام کا داماں ہے اور ہم


ساغر میں آج عارض ساقی کا عکس ہے
کافر بنائے جانے کا ساماں ہے اور ہم
حکمت سے ہو رہی ہیں تمنا نوازیاں
تشکیل خواب حاصل ارماں ہے اور ہم


تکمیل ہو رہی ہے محبت کی اس طرح
مہمانیٔ تصور جاناں ہے اور ہم
مشکل ہے شادؔ رہنا گرانی کے دور میں
اب پیرویٔ گوشہ نشیناں ہے اور ہم