ai mere dil ki raushni to yunhi jagmagae ja

ai mere dil ki raushni to yunhi jagmagae ja
mere jahan-e-shauq par kaif ban ke chhae ja
main usi tarah se rahun mahw-e-nazzara-e-jamal
aankhon mein aankhen dal kar tu yunhi muskurae ja


teri nazar ka hai khumar kahte hain jis ko dukht-e-raz
dil ki hawas ka wasta mast nazar pilae ja
mere tasawwuraat mein mere takhaiyyulat mein
ai meri jaan-e-arzu jalwa-ba-jalwa aae ja


tujh se nigah milte hi dil se to hath dho chuke
ab hai faqat ye aarzu jaan se bhi mitae ja