ajab kya hausle ai dil hamare tut jate hain
itab-e-gardish-e-dauran se tare tut jate hain

hui hain reza reza khud chattanen hum se takra ke
magar hum dekh kar aansu tumhaare tut jate hain

main chahun muskurana to chhalak jate hain ab aansu
ki aksar sail-e-dariya se kinare tut jate hain

nasihat ai meri beti hamesha dhyan mein rakhna
sahaaron par na takiya ho sahaare tut jate hain

'qamar' is bazm-e-duniya se nibhaen apna rishta kya
jo tuti sans to rishte hi sare tut jate hain